نظرية التأثير العقلي لأصحاب المتاجر الناشئة في صناعة المحتوى
فيه نظرية للتأثير العقلي احب اعطيها اصحاب المتاجر الناشئة عشان يطبقونها في صناعه محتوى لحساباتهم.
نظرية جدًا بسيطة واذا عرفت تطبقها في صناعة المحتوى باذن الله بتلقى نتائج ترضيك.
معلومة اليوم ببلاش تصير بكرة بفلوس.
بسم الله نبدأ
طيب النظرية ياصديقي تعتمد على ثلاث اسئلة لازم تجاوب عليها بشكل مُختلف وإبداعي.
طبعًا الاسئلة هذي اعتبر العميل يسألك عنها وابيك تجاوب بداله بأفضل طريقة ممكنه بالذات في محتواك اللي تقدمة سواء في الانستقرام او التويتر او اي مكان تصنع محتوى فيه لجمهورك.
يلا بسم الله
1- What؟ ويندرج تحتها؛
مين انت؟ وش تقدّم؟ وش فرقك عن غيرك؟ وش بتضيف لي؟
2- How؟
كيف اطلب منك؟ كيف اثق انك ممتاز وجودتك عاليه؟ كيف ممكن تخدمني بعد ما اشتري منك؟
3- Why؟
ليش اطلب منك؟ ليش اختارك من بين المتاجر؟ ليش احتاجك؟ ليش احطك خياري الاول دايم؟
كل هذي الاسئلة اذا جاوبت عليها وصغتها بشكل غير مباشر في صناعه محتواك راح تشوف فرق على المدى البعيد.
دايم فكّر بأسئلة العميل وش ممكن تكون وخل اجاباتك موجودة بشكل مُستمر في محتواك،
لا تحط جواب مباشر وتكتب (اختارني لاني احسن واحد)
بعلمك وش تسوي؟
دايمًا وصّل اجوبتك بطريقة غير مباشرة عشان يقتنع العميل "من نفسه" فيك اكثر مع الوقت،
توضيحها بشكل مباشر بيخلي عقل العميل يركز كيف مايقتنع فيك وبيبدا يقارنك بالمتاجر كلها،
اترك العميل على مزاجه ووصّل له الرساله اللي تبي توصّلها بس (من ورى التريلات) زي مايقولون.
انتهى.
