كيفية تحقيق أول بيعة في متجرك الإلكتروني !

كيفية تحقيق أول بيعة في متجرك الإلكتروني !

بديت متجرك وعجزت تحقق اول بيعه؟

تدري اصعب بيعه هي الاولى؟

طبعًا اقصد انك تبيع لشخص مايعرفك ولا تعرفه موب صديقك او اهلك او احد حولهم.

تعال معي بقولك خلطة تطبيقها مُهم وبيفرق معك كثير.

مقال واقعي ومليان فلوس.

اول شي الكلام اللي بتقراه يفيدك سواء بديت بالمتجر او توّك بتقول بسم الله.

اذا كنت توك مابديت حاب ابشرك انك بتنجح بشكل اسرع، اكيد بتسالني ليش !

طيب انت وقت انشاء المتجر والتجهيز، الطبيعي بتبدا تفتح حسابات بمواقع التواصل الاجتماعي، هنا ياصديقي ابدا بصناعه محتوى يخص متجرك.

صناعه المحتوى بتفيدك في جزئيات كبيرة ! اهمها التالي؛

1- لما يجهز متجرك اي احد بيشوف حساباتك بالتواصل الاجتماعي بيلقى حسابك مليان معلومات ومحتوى بشكل عام، هذا بيخلية يكنسل فكرة انك متجر جديد

"قليل يركزون بتواريخ التغريدات او البوستات".

2- في فترة صناعتك للمحتوى بتكسب اقل الايمان عميل واحد يثق انك بتقدّم له شي مميز

3- بتقدر تسوي حملات اعلانية "توعيه" للعملاء المحتملين وبتصير عارف مين يبيك ومين مهتم لمنتجاتك، ف اذا اطلقت المتجر بتكون الحملة الاعلانيه اكثر دقة فالاستهداف بالتالي نسبة انك تبيع بتكون اكبر.

طبعًا هنا ملخّص مفيد ويخدمك لصناعه المحتوى بشكل جدًا كبير:

تعال معي ماخلصت كلامي وصدقني بتبيع يعني بتبيع باذن الله.

صديقي اللي قال بسم الله وللحين عاجز عن البيع، اولًا الله يرزقك واسمع مني

جلوسك في مكان العميل = انك بتعرف وش الطريقة المناسبة لإقناعه

بمعنى فيه اشياء لازم لازم لازم تسويها:

1- المس عاطفه العميل

2- وضّح له واقنعه انه يحتاج منتجك

"بطريقة غير مباشره طبعًا"

ركز على موضوع "SEO" تصدرّك محركات البحث او وجودك بالصفحه الاولى هذا لحاله = وصول اكبر وزيارات اكثر وبالتالي "بتبيع"

وصف المنتجات؛ كل ماشدّيت حيلك بوصف المنتجات اكثر كل ماكسبت اكثر

^^ تركيزك لهالموضوعين وتطبيقها بشكل صحيح بيدعمك كثير اذا سويت حملة اعلانيه مُحترمة.

بحكم انك توك قايل بسم الله ونقول طبقت الكلام الموجود فوق بينقصك شي واحد بس:

جهز خصومات او عروض وحطها بحملتك المُمولة عشان تشجع العميل اكثر واكثر،

نصيحة اخ ! ابعد عن الاجتهاد الشخصي في عمل الحملات !

استعين بفري لانسر وخله يسويها لك وتعلم منه شوي شوي لين ماتتقن العملية.

طبّق واشتغل على كل شي قلته بدون تقصير، فيه جزئيات ممكن تكون سهله بالكلام ولكن صعبه بالتنفيذ والواقع ولكن !

ثق ثقة تامة هالصعوبات تجاوزها = نجاحك اولاً وتحقيق مبيعات تطمح لها او ماتتوقعها.

اتمنى اني افدتك ولو 1٪ .

انتهى.