كيفية تسعير عملك كفري لانسر
ودك تشتغل كفري لانسر بس ماتدري كم السعر المناسب لك؟
بديت تشتغل لكن تحس انك ظالم نفسك بسعرك؟
عندك مشكلة تواجهك ان العملاء يقولون سعرك غالي؟
خلك معي في المقال وامورك بتمشي باذن الله
شارك من حولك المقال لعلك تفتح ابواب رزق لهم
التسعير هو اهم نقطة للعمل كفري لانسر لدرجة ممكن يخليك تتردد فترة طويلة قبل تبدا الشغل.
بنبدا خطوة خطوة عشان تقدر ف نهاية هالمقال تطلع بصورة واضحه تخليك تقدر تحدد سعرك.
ابيك تجاوب:
الخدمة اللي تقدمها كم تاخذ منك وقت؟
كم سنين خبرتك فالمجال؟
جاوبت؟ مشينا للخطوة الثانيه
قبل ماتحدد سعرك ابيك تاخذ لفّه على هالاماكن:
1- ابحث في جوجل عن "متوسط" الاسعار لخدماتك اللي بتقدمها
2- تواصل مع مستقلين واسالهم عن تفاصيل اسعارهم
3- ابحث عن الاسعار في منصات العمل الحر
4- استخدم مواقع مثل:
HelloBonsai
Freelancer Rate Explorer
GlassDoor
عشان تعرف متوسط الاسعار.
ايضًا فيه اربع عوامل مهمه وتلعب دور كبير لازم تعرفها عشان تعرف كم المبلغ المناسب لك:
1- موقعك: يعني نفس الشغل اللي بتسويه في بلدك قد ينُفذ بسعر اقل او اعلى في بلد اخر
2- سنوات خبرتك: يعني بطبيعه الحال، كل مازادت خبرتك، زادت قيمتك
3- المؤهلات: بمعنى مثلا اذا عندك شهاده جامعية للخدمة اللي تقدمها طبيعي يكون سعرك اعلى من غيرك
4- حجم ونوع المشروع: اذا كان المشروع كبير فالطبيعي بتكون ساعات العمل اطول وبيتطلب مستوى مهارات اعلى = سعر اغلى.
اهم شي انك تكون واقعي بتحديد اسعارك ! بالذات اذا كنت توّك بادي فالعمل كفري لانسر !
بمعنى انتبه تكون اسعارك زي اسعار واحد له خبرة 5 سنوات مثلا.
الحين جا وقت الفلسفه حقتي اللي اتمنى تقنعك
حدد اسعارك بناء على:
1- كم تبي تكون ايراداتك بالشهر؟ ( لا تبالغ )
2- كل ما اكتسبت خبرة اكثر بالعمل، ارفع سعرك شويتين
3- جاك مشروع حبيته وتبي تشتغله ! عادي تنزل سعرك عشانه
4- راجع اسعارك كل 3 او 6 شهور
5- لا تعتقد ان الاسعار شي ثابت ! خلك مرن عشان تكسب عملاء
6- العميل الي يجيك دايم ضبطة بخصومات لانه ممكن يجيب لك 10 عملاء.
نصيحتي الاخيره لك: لا تحدد سعر ثابت في بدايتك!!
استقبل العميل وشوف وش يبي ووش يحتاج وبناءًا عليها حدد السعر اللي يناسبك وبمتوسط اسعار السوق.
اقبل بالسعر الرخيص في بدايتك وبيجيك الخير لا تستعجل على رزقك.
في بداياتك امش على هالنمط
مثال:
*: بكم بتسويه لي؟
**: انت كم ميزانيتك؟
*: 50 ريال
**: عشانك عزيز وغالي تم
شوي شوي بتكسب عملاء وبتقدر تحدد سعر مناسب للسوق + مناسب لجهدك وطموحك.
انتهى.
