اساليب السوبرماركت

اساليب السوبرماركت

وش عندنا بهالمقال؟

بفتّح عيونك وعقلك الواعي لاشياء يجبرك عليها عقلك الباطن لا شعوريًا

هل نحن نتسوق بحرية؟ هل قراراتنا الشرائية دايم تكون تحت إرادتنا وقرارات واعيه 100%؟

يهمني جوابك جدًا

لكن ابيك تجاوبني بعد ماتنتهي من قراءة المقال

وضع المنتجات المهمة في اخر السوبرماركت

دايم تشوف الاطعمه الاساسية مثل الخبز، الدجاج، اللحوم في اخر المحل، لأن 90% من الاشخاص يدخلون السوبرماركت بيشترون هالاشياء لانها ضرورية، لذلك يحطونها في اخر المحل عشان يمر المتسوق بجميع اقسام السوبر ماركت وتزيد فرصة شراءه منتجات.

حلو؟

ممكن المعلومة اللي قريتها قبل شوي ممكن مرت عليك ! او تحسّها شي بديهي، خلني الحين ابدا اقص لك القصّه بطريقتي شرايك؟

يلا بسم الله..

كم مرة دخلت سوبرماركت تبي شي معيّن انت عارف مكانه ولقيتهم مغيرين مكانه؟

تغيير اقسام المنتجات

ليش ي حمد؟!

ببساطة السوبرماركت دايما يهدفون ان العميل مايحفظ اماكن المنتجات

ياخي ليش طيب وش المشكلة لو حفظت؟!

بقولك اول هدف تسعى له السوبرماركت هو انها تزيد حركتك العشوائية

والتحدي هنا ! كيف بتقدر تمسك نفسك وماتشتري اشياء ماتحتاجها وانت جالس تمشي بين الاف المنتجات لين توصل للمنتج اللي انت جاي عشانه اساساً.

طبعا هالطريقة مايسوونها مع المنتجات الرئيسية مثل الخبز او الالبان او اللحوم اللي هي بالعادة تكون في اخر السوبرماركت زي ماقلت لك بالبداية.

خلنا نقول انك وصلت للقسم اللي تبيه وجيت تبي تشتري زيت مثلاً

•  
• قدامك 50 نوع مختلف صح؟
• تدري ايش بتختار منهم؟
•  
• بالغالب راح تشتري الزيت الموجود بنفس مستوى نظرك

والسبب ان هذا المنتج هو اول منتج طاحت عينك عليه.

اصبر بعلمّك كيف عرفت اختيارك..

بالمختصر هم ماشين على مبدأ: (رؤية العين بشكل افقي اسهل بكثير من رؤيتها بشكل عامودي).

العديد من الدراسات تنص على ان المتسوق سوف يقوم باتخاذ قرار الشراء في اقل من 8 ثواني إذا كانت ارفف المنتجات موازية لمستوى نظره.

عرفت الحين ليش حلويات الاطفال والاشياء هذي دايم تكون في مكان منخفض؟

لانها بتكون على مستوى موازي لعيون الطفل لو تركز لازم يحطونه عند الكاشير ليش؟

لان هذا اكثر مكان بتوقف فيه مع طفلك فإذا ازعجك طفلك وحولك ناس وزحمة !

راح تتنجبر تشتري له لانه حطك بموقف محرج قدام العالم.

على فكرة تراهم يلعبون برضو في موضوع "الموسيقى والروائح + درجة الجرارة" عشان يخلقون لك جو جميل.

وسبق وتكلمت عن الروائح والموسيقى في مقالات سابقة اذا ودك تقراها.

خلني اعطيك كم نصيحه ممكن تفيدك بهالموضوع..

لا تروح للسوبرماركت وانت جوعان؛ لانك فالحالة هذي صدقني بتشتري اشياء غير ضرورية او بتشتري كميات اكبر من حاجتك.

لا تاخذ عربية كبيرة؛ لانك راح تملاها لا شعورياً، استخدم يدينك او سلة صغيرة.

انتبه تروح ومامعك قائمة بالاغراض اللي تبيها؛ عشان ماتجيب العيد وتشتري الدنيا كلها.

انتهى المقال.

اتمنى انكم استمتعتم واستفدتم واعتذر على التقصير.