تسويق العيادات الطبيّة

‏30 اغسطس 2021 مدونة

 

تسويق العيادات الطبيّة

 

 

وش عندنا بهالمقال ياحمد؟

التسويق للعيادات صعب جدًا وهنا بخليه لك اسهل من السهل

صاحب عياده؟

تشتغل في عياده؟

ودك تقدّم خدماتك كفري لانسر للعيادات؟

دكتور وتبي تسوّق لعيادتك؟

خلك معي واوعدك تستفيد

مقال واقعي جدًا جدًا جدًا.

 

1- انشئ مجتمع على مواقع التواصل الاجتماعي

لازم تستوعب ان مواقع التواصل الاجتماعي موب فقط للاعلان عن خدمات او عروض،

لازم تبني لك مجتمع مهتم باللي تقدمه عيادتك.

بتسالني ليش؟ بناء علاقة قوية مع العميل تجعل عيادتك الاختيار الاول عند احتياج العميل لأحد الخدمات اللي تقدمها.

بمعنى اوضح ومُختصر،

متابعة العميل لك وبناء علاقه قويه معه = ماراح يصير العميل يسمع عنك كل 6 شهور اذا اعلنت ! بيصير يسمع عنك كل يوم تقريبًا.

"ابني علاقه قوية مع العميل لتصبح خيارة الاول دائمًا".

 

2- ركز على محركات البحث

الخطوة هذي اهم خطوة من رايي

بقولك ليش؟

المريض اذا احتاج دكتور بيبحث عن افضل دكتور بالمنطقة حلو؟

يعني استهدافك لكلمات في محركات البحث عن خدماتك وعن المدينه اللي انت فيها = سهولة وصول العميل لك وبكذا مبيعاتك بتوصل للسماء.

 

3- انشئ موقع الكتروني

ماراح تطلع في محركات البحث الا اذا عندك موقع طبعًا

وش فايدة الموقع؟

1- جمع بيانات العملاء

2- تمكين العميل من حجز موعد عبر الانترنت

3- اعادة التسويق لزوّار موقعك، طبعًا لا تنسى تربط الادوات اللي تساعدك في التحليل عشان تعرف تستهدف عملاء مشابهين لعملائك.

 

4- انشئ محتوى وقدّم قيمة للعملاء

التسويق بالمحتوى سلاح قوي جدًا ي صديقي يعني بنائك لمحتوى مناسب بيخليك تقدر تبني علاقه مع عملائك المحتملين وتخليهم عملاء لك.

 

5- اعلن في قوقل

طبعًا عشان تظهر في محركات البحث لازم تعلن اعلانات مدروسه من جميع النواحي،

اختيار ( الوقت - الايام - المدّه ) هي سلاحك في الاعلانات.

 

6- التذكير بالمواعيد

طبعًا مرحلة النمو لعيادتك بتعتمد بشكل كبير على تجربة العميل، يعني لازم تقدّم افضل تجربة لعملائك من حيث الاهتمام بالمواعيد والتذكير بها، طبعًا تقدر تستخدم؛

1- رسائل نصيه

2- مكالمة

3- رساله على الايميل.

ركز على حصولك على ايميلات العملاء وبعلمك ليش.

حصولك على ايميلات العملاء بيساعدك على نشر مقالات وزياده التواصل مع العملاء لان معدّل القراءة بيزيد اذا كان محتوى مقالاتك ممتاز، وبكذا تكون كسبت العميل اكثر.

طبعًا زياده على مقالاتك اللي بتنشرها، بتقدر تنشر عروضك وخدماتك واشياء كثير.

اهم شي اعطي العميل حرية الغاء الاشتراك.

 

7- اعادة التسويق

 

هالعنوان = اعادة عرض اعلاناتك على العملاء السابقين.

لكن لا تنسى انك تعطي العميل تجربة تستحق الاعاده.

طبعًا فيه طرق كثيرة بمكانك اعادة التسويق من خلالها مثل:

1- زوار الموقع

2- المشتركين فالقائمة البريديه

3- المتفاعلين مع اعلانك المُمول.

اعادة التسويق صدقني بيعطيك عائد استثمار اعلى من اللي تتوقعه.

 

اخيرًا؛ فيه طرق وافكار كثيرة للتسويق للعيادات لكن اعتقد هذي اهمها + راقب منافسينك اكثر من اي شي !

يعني خلك سابقهم بخطوه دايمًا.

"العميل اللي بيحصل على تجربة رائعه، بيفكر يعيدها الف مره وينصح الف شخص فيها".

 

اعتذر على التقصير، وشكرًا لكم جميعًا 

انتهى المقال.

هل أنت كاتب محتوى ؟

أطلق مدونتك مجاناً على عصارة

سجّل الآن

كيف انشئ حساب في أكاديمية عٌصارة

خطوات انشاء الحساب