بقول طريقتي قدامكم كلكم بالتفصيل المُمل وتأكدوا ان مو الكل بتضبط معه طريقتي لكن حاول وجرب لاني مقتنع تمام القناعه كل شخص بالدنيا ذي له طريقته "الخاصه" اللي بيكتشفها مع الوقت
اولا للمعلومة انا لي شهرين ونص تقريبا متفاعل بالتويتر بدايتي كانت مجرد متفرج لا اكثر ولا اقل.
بخلي عني الكلام الفاضي ذا وببدا بالكلام المهم اللي لازم تعرفه ياصديقي.
بسم الله نبدأ
كإنسان طبيعي عندي تخصص اكاديمي ولي شغف في مجالات اخرى جلست مع نفسي وسويت عصف ذهني وصرت امشي بحياتي بدفتر وقلم طول الوقت !
لقيت ان تخصصي تسويق وانا مهتم ومعي شهادات بعلم النفس واحب تطوير الذات، صرت اتابع ناس مهتمين بالتويتر بهالثلاث اشياء !
حلوين؟
قلت بسم الله وبديت اصنع محتوى احاول اجمع فيه هالثلاث اشياء اللي احبها بطريقة غير مباشرة، والحمدلله من حظي ان فيه حساب عملاق زي
يدعم الحسابات المهتمة بمجال التسويق بشكل عام.
بدايتي كنت اشوف محتواي اقل من عادي ومافيه شي واقعي او ملموس !
لكن استمريت اكتب وبديت اعدل
قلت ابي قيمة مضافه ايضا لمحتواي، صرت استخدم كانفا عشان اصمم صور بسيطة لبداية اي ثريد اسوية، وبعد كذا الشخص اللطيف هذا
رمى علي نصيحة !
وشي النصيحة؟ قال حاول تصنع لك هوية شخصية بحيث انك تحط اسد مرتب مع اسمك ويكون لك لوقو مرتب ولطيف.
طبعا قلت له اوكي
حاولت اسوي وطلعت بتصميم خفيف بسيط وعجبني وانطلقت منه بديت اتفاعل مع المجموعه اللي اتابعها لان كلهم مهتمين بمجالاتي اللي احبها، انصح هذا وامزح مع هذا لين كسبت اكثر من علاقه مع كم من شخص مثل
واشخاص كثير للأمانه لكن ممكن مجيد اكثر شخص طقيت ميانه معه وصرت اتعلم منه
بكذا صار لي اصدقاء بالتويتر + انا اصنع محتوى + فيه حساب كبير يدعمني + اصدقاء التويتر صاروا يساعدوني من جميع النواحي "التصميم يزبدون لي اذا صار بايخ"، طريقتي بالتسويق بالعمولة يعدلونها لي، ويدعموني برضوا برتويت او لايك اذا صنعت محتوى !
الجميل بالموضوع اني صرت متمكن اكثر في صناعه المحتوى! بحيث اني صرت اعرف اكتب عنوان يجذب الناس + اكتب المحتوى بشكل بسيط الكل يقدر يفهمه ويستوعبة حتى الاطفال! ومشيت بالخطة هذي: "كل يوم ثريد غريب عجيب" واعتقد كثير صاروا يعرفون اني ابو الشطحات بالثريدات! + تفاعل مع الناس
سويت 30 ثريد في اول شهر ! بحكم عقلي مليان بمواضيع ف فرغت كل اللي فيه على مدى شهر.
اول شهر بعد تطبيق هالطريقة (وصلت الى 3 مليون مشاهدة + 1000 متابع )، وكنت اتفاعل مع المتابعين دايم ومستحيل اترك احد بالمنشن او الخاص ما ارد عليه).
بالنسبة لي اذا قدرت توصل ل1000 متابع يحب محتواك ويتفاعل معك خلاص اعتبر زيادة الاعداد بيكون مسألة وقت فقط لا غير، كل مازادوا متابعيني كل مازادت علاقاتي بالأشخاص وصرت اتفاعل اكثر.
يقولون حقين التويتر الشخص يحتاج 15 تغريدة باليوم عشان امور حسابه تكون كويسه !
محدثك اللطيف صار باليوم يغرد اكثر من 200 تغريدة ! اغلبها تفاعل مع الناس اللي مايتابعوني او مايعرفوني! مع الوقت صاروا كثير يشوفون تغريداتي بإستمرار بس مايتابعوني، تتوقع ليش؟ بكل شفافيه يقولون حمد انت ما شاء الله نشيط بزيادة (بثر). فوجودك بالتايم لاين مزعج بالنسبة لنا.
كشخص يغرد 200 تغريدة باليوم بتقول ذا فاضي ماعندة حياة ! بس ابشرك اني موظف ولي اعمال حرة كثير والجوال ماينزل من يدي !
بتسألني كيف اجل تغرد 200 تغريدة اذا انت عندك الف شي تسويه ! بقولك ياصديقي فيه برامج تجدول تغريداتك بحيث انك ترتب التغريدات اللي تبيها متى وكيف تنزل !
المحتوى اللي اصنعه اجدولة بالبرامج هذي، وباقي يومي اسولف مع الناس ! انصح هذا وامزح مع هذا واشارك رأيي حتى لو مانطلب مني ولكن بأسلوب لبق عشان يتقبله الشخص وما يزبد لي (مع اني تزبد لي كثير).
عشان اكون واضح معك اكثر ! الثريد هذا انا مجدوله ف الحين وهو ينزل انا ارد على ناس بالخاص او امنشن ناس وعايش سعيد (خف علينا ياعبدالمجيد). الافاتار اللي تشوفه الحين سواه لي شخص من نفسه بدون ما اطلبة تتوقع ليش؟ لاني كنت اساعده اذا سألني عن شي !
اللايك والريتويت ببلاش ! لا تبخل على احد فيها حتى لو متابعينه 0 !! النصائح والمعلومات اللي عندك لا تبخل فيها على احد او تقول ادفعوا لي ! انا قدمت مليار استشارة الظاهر ببلاش وانا مبسوط وراضي ! عندي معلومة او نصيحة تفيد شخص ليش ما اقدمها له ؟ مساعدتك للناس مردك بتشوف نتيجتها.
هذا شخص نصحته او وجهته توجيه صحيح ومتابعينه 0 بكرة بيصير عنده 10000 وبيساعدك ويدعمك ! لا تفكر انك تكون مرة كويس مع الناس اللي متابعينهم كثير وبس ! تفاعل مع الحسابات الصغيرة لانهم صدق هم اللي بيدعمونك توصل لأي شي تبيه !
دخلت التويتر وبديت اغرد وقدامي هدف (اساعد اي شخص يستشيرني، ابني علاقة جيدة مع الناس، اقدم المحتوى بطريقتي الخاصة "وكثير حاولوا يسرقون افكاري" وعادي مبسوط لاني واثق ان لي طريقتي الخاصة اللي تخلي المتابع يعرف قيمتي !).
مافكرت مجرد تفكير اني اتكلم بمصطلحات علمية او انجليزي ! ليش؟ لان الناس تحب البساطة ياخي تحب السهل الممتنع ! لا تعتقد مجرد اعتقاد انك بتجذب احد وانت تتكلم بلهجه صعبة وتصعب الدنيا وهي وسهله ! واذا جذبت فهم فئة بسيطة جدا !
اعتقد كذا قدرت اوضح لك جزئيات كثيرة ممكن كنت غافل عنها ! اعتذر اني كثرت عليك واتمنى اني افدتك لو واحد بالميه.
تقدر تشوف صناعتي للمحتوى قد ايش غريبه ومواضيعي شاطحه واستلهم منها اسلوبك الخاص والله يوفقكم.
تذكرت شي نسيت اقوله لكم
"والله احبكم ياقروب المطانيخ"
الحب ديالي
